ДОВТАЛАБ: ИНТИХОБИ МАН – «КОЛЛЕҶИ ОМӮЗГОРИИ ШАҲРИ ТУРСУНЗОДА»!
Муассисаи давлатии таълимии «Коллеҷи омӯзгории шаҳри Турсунзода» қабули донишҷӯёнро тариқи Маркази миллии тестии назди Президенти Ҷумҳурии Тоҷикистон эълон менамояд.
Муассисаи давлатии таълимии «Коллеҷи омӯзгории шаҳри Турсунзода» бо қарори Ҳукумати Ҷумҳурии Тоҷикистон аз 19.04.2001, №200 таъсис дода шуда, соҳиби иҷозатнома оид ба ҳуқуқи пешбурди фаъолияти таълимӣ бо силсилаи АУ № 0002866 аз 07.11.2019, № 3427-и Вазорати маориф ва илми Ҷумҳурии Тоҷикистон гардидааст ва дар зинаи таҳсилоти миёнаи касбӣ ва иловагӣ аз рӯи самт мутахассисони соҳаи омӯзгорӣ омода менамояд.
Ҳадафи асосии муассиса амалӣ намудани дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба тайёр намудани мутахассисони дар бозори меҳнат рақобатпазир мебошад. Бо ин мақсад дар муассиса тайёр намудани мутахассисон дар асоси омӯзонидани донишҳои касбии омӯзгорӣ, сатҳи баланди муошират дар фаъолияти омӯзгорӣ, технологияҳои инноватсионии муосир, на кам аз 2 забонҳои хориҷӣ ба роҳ монда шудааст.
Дар муассиса 755 донишҷӯ таҳсил намуда, аз рӯи ихтисосҳои таҳсилоти томактабӣ, таҳсилоти ибтидоӣ, омӯзгори забон ва адабиёти тоҷик, омӯзгори забон ва адабиёти рус, омӯзгори забони англисӣ, математика, информатика, биология, таърих ва тарбияи ҷисмонӣ соҳиби ҳуҷҷати намунаи давлатӣ (диплом) мегарданд.
Сохтори муассисаи таълимӣ 8 августи соли 2022 таҷдид гардида, ҳайати маъмурияти он аз директор, 4 ҷонишин (оид ба таълим, оид ба корҳои тарбия, оид ба илм ва инноватсия, оид ба корҳои маъмурӣ-хоҷагидорӣ), 5 шуъба (таълим, хоҷагидорӣ, ҳисобдорӣ ва банақшагирӣ, кадрҳо ва корҳои махсус, коргузорӣ ва назорат), 6 бахш (сифати таҳсилот, таҷрибаомӯзӣ ва кор бо мутахассисони ҷавон, тарбия ва кор бо ҷавонон, занон ва кор бо оила, илм ва робитаҳои хориҷӣ, ғоибона), 2 факултет (факултети омӯзгорӣ ва факултети фанҳои гуманитарӣ), 4 кафедра (ҷомеашиносӣ, забонҳо, фанҳои табиӣ-риёзӣ ва методикаи таълим), маркази бақайдгирӣ, машваратӣ ва тестӣ, парки технологӣ ва бунгоҳи тиббӣ иборат аст. Ҳамчунин, соли 2023 дар муассиса китобхонаи замонавӣ ва синфхонаи компютерӣ таъсис дода шуд, ки бо таҷҳизоти зарурӣ таъмин мебошанд.
Муассисаи таълимӣ дар шабакаҳои иҷтимоӣ (Facebook ва Telegram) саҳифаҳои худро дошта, сомонаи расмии он таҳти домени www.kosht.tj амал мекунад.
Дар муассиса чорабиниҳои илмӣ-фарҳангӣ мунтазам баргузор гардида, донишҷӯёне, ки дар марҳилаҳои вилоятӣ (минтақавӣ) ва ҷумҳуриявии озмунҳои «Фурӯғи субҳи доноӣ китоб аст», «Тоҷикистон – Ватани азизи ман», «Илм – фурӯғи маърифат» ва ««Тоҷикон» – оинаи таърихи миллат» сазовори ҷойҳои намоён мегарданд, аз ҷониби роҳбарияти муассиса мукофотонида мешаванд. Аз 60 нафар омӯзгорони дарсдиҳанда 6 нафар номзади илм, 16 нафар муаллими калон, 30 нафар ассистент, 8 нафар коромӯз-тадқиқотчӣ, аз ҷумла 18 нафар Аълочии маориф ва илми Ҷумҳурии Тоҷикистон мебошанд.
Дар муассиса аз рӯйи нақшаҳои таълимии Вазорати маориф ва илми Ҷумҳурии Тоҷикистон ва замима ба иҷозатнома, ки аз ҷониби Агентии назорат дар соҳаи маориф ва илми назди Президенти Ҷумҳурии Тоҷикистон пешниҳод гардидаст 5 ихтисоси баъди хатми синфи 9 амал менамояд:
| ихтисоси 2- 02 03 01 | Забон ва адабиёти тоҷик |
| ихтисоси 2-01 02 01 | Таҳсилоти ибтидоӣ |
| ихтисоси 2-02 05 01 | Математика |
| ихтисоси 2- 01 01 01 | Таҳсилоти томактабӣ |
| ихтисоси 2-02-01-01 | Таърих |
Дар асоси нақшаҳои зикргардида дар муассиса 10 ихтисоси баъди хатми синфи 11 амал менамояд:
| ихтисоси 2- 02 03 01 | Забон ва адабиёти тоҷик |
| ихтисоси 2- 01 02 01 | Таҳсилоти ибтидоӣ |
| ихтисоси 2- 02 0306 01 | Забони хориҷӣ (англисӣ) |
| ихтисоси 2- 01 01 01 | Таҳсилоти томактабӣ |
| ихтисоси 2- 02 0302 | Забон ва адабиёти рус |
| ихтисоси 2- 02 05 01 | Математика |
| ихтисоси 2- 02 05 05 | Информатик |
| ихтисоси 2- 02 04 01 | Биология |
| ихтисоси 2-02-01-01 | Таърих |
| ихтисоси 2-03-02-01 | Тарбияи ҷисмонӣ |
Бо назардошти муваффақона азхуд кардани барномаҳои таълимӣ ва иштироки фаъол дар корҳои ҷамъиятӣ, бо фармоиши директори муассиса ва комиссияи таъиноти идрорпулӣ ба донишҷӯёни шуъбаи рӯзона, шакли таҳсили буҷавӣ, донишҷӯёне, ки сессияро бо баҳои хубу аъло ҷамъбаст менамоянд, идрорпулӣ (стипендия) таъин карда мешавад.
Ҳамчунин донишҷӯёне, ки сессияро бо баҳои аъло ҷамъбаст менамоянд, идрорпулии аъло мегиранд.
Донишҷӯёни бахши якум, ки тариқи Маркази миллии тестии назди Президенти Ҷумҳурии Тоҷикистон дар шакли таҳсили буҷавӣ дохил мешаванд, идрорпулӣ мегиранд. Ҳоло дар муассиса ба 135 донишҷӯ идрорпулии хубу аъло ва ба 35 донишҷӯ идрорпулии хубу миёна таъин карда шудааст.
Дар доираи фаъолияти парки технологии муассиса курсҳои дӯзандагӣ ва дизайнерӣ ба роҳ монда шуда, сарулибоси ягонаи донишҷӯён дар сехи дӯзандагии муассиса омода карда мешавад.
Масъалаи будубоши донишҷӯёни минтақаҳои дурдаст ва таъмини онҳо бо ҷойи зист то имрӯз дар асоси шартнома бо хобгоҳҳои хусусӣ ба роҳ монда шуда, корҳои муқаддимавӣ ҷиҳати бунёди хобгоҳи муассиса барои донишҷӯён оғоз гардидааст.
Гузаштани таҷрибаомӯзӣ қисми зарурии омодасозии мутахассисони соҳибмалака буда, донишҷӯёни муассиса давраи таҷрибаомӯзиро дар муассисаҳои миёнаи умумӣ ва томактабии ҷумҳурӣ мегузаронанд.
Тибқи нақшаи таълимӣ дар муассиса се намуди таҷрибаомӯзӣ мавҷуд буда, гурӯҳҳои бахши якум ба таҷрибаомӯзии таълимӣ, бахши дуюм ба таҷрибаомӯзии педагогӣ ва бахши сеюм ба таҷрибаомӯзии пешаздипломӣ ҷалб карда мешаванд.
Муассиса фаъолияти таълимии бахши ғоибонаро тариқи анъанавӣ ба роҳ мондааст ва таҳсил дар бахши мазкур ҳам тариқи буҷавӣ ва ҳам тариқи шартномавӣ роиҷ аст.
Дар муассиса дарсҳо аз ҷониби омӯзгорони соҳибтаҷриба тариқи тахтаи электронӣ гузаронида шуда, аттестатсияҳои бахшҳои рӯзона ва ғоибона тавассути Маркази бақайдгирӣ, машваратӣ ва тестӣ амалӣ карда мешавад.
Комплекси таълимии муассиса аз бинои якошёнаи таълимӣ, аз ҷумла 18 адад синфхонаҳои таълимӣ, 2 факултет, 4 кафедра, 17 утоқи корӣ, Маркази бақайдгирӣ, машваратӣ ва тестӣ, Парки технологӣ, китобхона, маҷлисгоҳ ва толори конференсия, майдончаи варзишӣ ва ошхона иборат аст. Китобхонаи муассиса аз фонди китобҳо, китобхонаи электронӣ ва қироатхона иборат буда, дар он зиёда аз 5 ҳазор китобҳои илмӣ, бадеӣ ва соҳавӣ, ҳамчунин зиёда аз 20 ҳазор китобҳои электронӣ мавҷуд аст.
Муассисаи таълимӣ дорои 50 адад компютери фаъол ва 10 адад тахтаҳои электронӣ буда, атрофи он бо 25 адад камераҳои назоратӣ бо сифати дақиқ (HD) муҷаҳҳаз мебошад.
Соли 2024 муассисаи таълимӣ ният дорад, дар ҳамкорӣ бо ташкилоти ҷамъиятии «AКД Ҷопон» тавассути фароҳам овардани муҳити бидуни монеа дар ҳудуди муассиса ва ба роҳ мондани тадбирҳои иттилоотӣ оид ба қабули шахсони дорои маъюбият ба пешбурди таҳсилоти фарогир дар минтақа мусоидат намояд.
Дар муассиса ҷиҳати тайёрӣ ба имтиҳонҳои марказонидашудаи Маркази миллии тестии назди Президенти Ҷумҳурии Тоҷикистон аз руйи панҷ ихтисоси амалкунанда курсҳои омодашавӣ тариқи ройгон ба роҳ монда шуда, довталабон метавонад аз моҳи январи соли тақвимӣ ба омӯзиш фаро гирифта шаванд.
