Табрикоти директори МДТ «Коллеҷи омўзгории шаҳри Турсунзода» номзади илмҳои филологӣ, Сафарзода Хуршед ба муносибати 25-умин солгарди Рўзи Ваҳдати миллӣ
Омўзгорону донишҷўён ва шогирдони гиромӣ!
Бо эҳсоси шукргузорӣ аз фазои орому осоиштаи Ватани маҳбубамон ҳамаи Шуморо ба муносибати 25 — умин солгарди Рўзи Ваҳдати миллӣ самимона муборакбод намуда, ба Шумо сиҳатмандии комил, рўзгори босаодат, бахту иқболи накў ва ба Ватани азизамон сулҳу оромии ҳамешагиро таманно менамоям.
Имсол аз санаи барои халқу давлати мо тақдирсоз – ба имзо расидани Созишномаи умумии истиқрори сулҳ ва ризоияти миллӣ дар Тоҷикистон 25 сол пур мешавад. 25 соли эҳёи миллӣ, баҳамоӣ, худсозӣ, худшиносиву худогоҳӣ ва 25 соли сулҳу субот ва эъмори ҷомеаи озоду демократӣ, ки саҳифаҳои рангини таърихи навини давлатдории моро ташкил медиҳанд.
Ваҳдати миллӣ боис гардид, ки тамомияти арзӣ ва ягонагии сарзамини мо ҳамчун кишвари ягонаи мустақил ҳифз гардад. Мардуми тоҷик оқибатҳои ҷанги харобиоварро саривақт дарк намуда, бо эътимоди қавӣ ба нигоҳ доштани якпорчагии давлати худ, таъмини сулҳу ваҳдати миллӣ дар он ва мустаҳкам намудани рукнҳои давлатдорӣ азм намуд.
Ин аст, ки халқи Тоҷикистон ин санаи барқароршавии сулҳу ваҳдати сарнавиштсозро ҳамчун сарчашмаи якдилӣ, ҳамдигарфаҳмӣ ва дўстию рафоқат пазируфт ва то имрўз онро бо камоли таваҷҷўҳ қадр мекунад.
Аз ин рў, бо нияту ормон ва орзўҳои нек ҳамаи Шуморо ба муносибати Рўзи Ваҳдати миллӣ муборакбод намуда, бароятон хонаободӣ, оромиву осудагӣ ва некбахтию хушрўзиҳо таманно мекунам.
Бигзор, хуршеди сулҳу ваҳдат ва муҳаббату бародарӣ бар фарози Тоҷикистони озоду соҳибистиқлол то абад тобанда бошад!
Рўзи Ваҳдати миллӣ муборак бод!